Watch and track your favorite playlist.
Curated by: 試當真Trial & Error (301 videos)
早晨，我啱啱撞到一位人兄，呢位人兄由打招呼嗰一刻，我就感受到佢有一種彭拜嘅分享欲。 我要唔要同佢吹水呢？我內心係有個掙扎，因為我知道喺呢啲凌晨時份一吹，就雙方都會唔捨得走。果然，一傾就個幾鐘頭。 一開始嘅起手式，都係互相問候對方嘅近況啦，講吓試當真係咪真係執笠，之後又有咩搞啊，加油啊，個市好難做啊，香港電影都要收皮喇，大家都要撐住喇。過咗呢段無聊嘅香港人經典small talk之後，我地好快就進入戲肉喇。佢話佢戒賭成功，我問佢賭咩呢，佢話佢成日都喺觀塘賭錢，賭到上哂癮，觀塘有咩賭啊。原來係夾公仔。佢話佢最癲嘅時候，一日係會夾3、4000蚊。 夾公仔有咩咁好玩啊，我一直都唔明。而家我明喇，佢解釋咗我聽夾公仔嘅生態圈我聽。夾公仔，一般就分街坊同夾客。街坊即係經過夾兩野，拍拖或者一班frd消譴下。而夾客呢，就分幾個tier，最基本就係識得睇邊啲機容易執雞，有chance夾幾round就出到貨。上一個tier就係識得點樣砌咗山或者去操作一個陣去拆咗原本部機砌好嘅陣。再上一個tier呢，我就唔係好明嘅，但大概就係話係識得數每部機嘅獨有「拍子」去操作隻夾去令到自己更加易夾到啲公仔。再上一個tier呢，就計到自己要用幾多round，即係要入幾多錢，先夾到一個價值相若，甚至更高嘅價值既公仔拎上carousell到賣。 呢位人兄話佢就係呢個tier喇本身，但真係太沉迷，所以明明計過條數，自己好大機會蝕張嘅呢，都硬係要夾。所以，再後來佢就自己租部機，畀自己夾。咁租一部機都係幾千蚊姐，日日自己夾都好過走去人地部機到夾畀錢人賺。但佢後尾先發現，原來上癮上到佢咁呢，自己租部機夾返自己啲貨係好冇癮。係都要去人地果部機果到夾人地啲公仔。原來係因為咁嘅，因為你可以夾到人地台機既貴貨之後呢，可以將人地啲公仔擺落自己果部機到，做自己部機既貨，去等其他人夾。咁自己果部機，又可以set一個難啲嘅陣，難啲計算嘅拍子，去防守，等人地冇咁易夾到。我淨係聽呢，都已經感受到呢件事有幾上癮，好似細個玩online game咁，可以守自己既城，又攻人地既城。咁後來佢點戒賭呢，就係佢自己直頭做埋個夾公仔場嘅場主，一做咗場主呢，就好多admin野要處理，冇心神再花咁多時間去夾公仔喇。果然，admin嘢的確係可以摧毀一個人嘅興趣！（笑） 佢話而家仲會同啲兄弟落場，拉下啲太上癮嘅夾客去社企，搵下其他生活嘅意義。將夾公仔變返簡單嘅娛樂，好似打下機咁，唔好將佢變成賭錢。 好彩我有食呢餐宵夜。本身我係剪緊片，同時寫緊呢一期嘅vlog，我同自己講，絕對唔可以，因為捱通宵而破戒，但最後都係敵不過引誘。但好彩我敵不過呢一個引誘，落咗樓下間真姐到篤燒賣魚蛋，如果唔係都撞到呢一位咁有趣嘅人兄。如果佢對夾公仔上左癮，我可能都對同陌生人傾偈上左癮。同一啲唔識嘅人係街上面無啦啦吹水，聽佢地奇奇怪怪嘅故事，實在係太過癮了。 呢位人兄仲分享咗好多其他經歷，有機會再同大家分享！言歸正傳，講返原本寫好咗嘅稿先。 最近呢，我依然係用好多AI，仲開始熟習咗ai用廣東話講嘢時嘅文筆。有時，我都會玩嘢用呢種ai文筆去覆人，效果都相當搞笑。不過，整整下，我發現而家自己講嘢，有時都會有啲AI嘅感覺。包括今日嘅呢個vlog，我打完篇文字稿，我都覺得，有少少AI味。但係，我想講，入面每一隻字都係我自己寫出嚟，千祈唔好誤會。 今期vlog想分享一下，最近汲收到的一些知識。分享之前，想和大家探討一下「知識」這個詞語。 記得小時候聽收音機，一位電台節目主持人發表過一個見解，區分資訊和知識的分別。資訊是訊息，而知識是經過理解、消化和思辨的訊息。根據後台數據，觀眾們跟我的年紀都差不多。你們有沒有想過上一代人很可憐，因為到了我們這一代，人人都已經有電腦，先不論娛樂，就算你是個好學青年，世上所有知識都可以在家中汲收。後來，有了智能手機，簡直像擁有超能力。有些人常說，現代人很可憐，許多事情都沒法經歷。我當時常想，上一代才最可憐吧，他們小時候都沒有google及google map。應該 當然，這個想法十分天真。在搜尋網頁上，你可以搜尋任何範疇的資訊，卻不代表你能從中汲收知識，每天用google map，不代表你在街上很有方向感，也不代表你比起上一代更熟悉香港的地理常識。 小學時作文，許多時都以現今社會資訊發達作段落的開首，有時我又會想，常常這樣說，像隱隱然地貶損上一代。如今反思，其實相當精準，現今社會資訊的確發達。只是「資訊」發達，不是「知識」發達。不過，2025年開始，我懷疑我們可以說現今社會是「知識發達」了。理由好簡單，兩個英文字「chat gpt4o」同「grok」。接下來嘅段落，唔係一篇吹奏AI嘅文章。而係小明喺2025年如沐春風嘅故事。 小明是一位好奇心滿滿的男生，每當他對呢個世界產生疑問嘅時候，佢都想尋根究底，但小明有冇尋根究底呢？ 小明話，有。有尋根，但好難究底囉。即係，我去圖書館借書？我要借幾多本？屌你，我唔係冇試過，借幾本書，以為可以搵到答案，結果呢？睇完產生嘅問號可能仲多。可能你會話，學海無涯，永遠都係咁，你愈知得多，問號就愈多。但我想講，嗰啲問號唔係好奇求知帶畀你嘅甜蜜問號，而係搞到一頭煙嘅痛苦問號。 舉例，我想知道佛學上「無常」、「無我」係咩概念，你睇書知道咗個答案大概就係，世界冇嘢係永恆嘅。但你會同時產生好多疑問㗎嘛，如果世界無嘢係永恆的話，咁「世界冇嘢係永恆」呢個概念係唔係永恆呢？如果人可以做到「無我」嘅境界，咁而家係邊個理解緊「無我」呢個概念呢？無我係指叫人放低執著？定係真係想講意識嘅真相係冇「我」呢？我都好相信呢啲問號，可以係書本到搵答案，但你一時間都唔知點搵，亦唔係上網就好容易search到嘅嘢。 但係，2025年，你喺gpt上面問，「如果佛學講無我，咁而家邊個同你打緊字」，佢都會畀到答案你。當你再問，如果佛學主張「無我」，咁邊個「輪回」緊？而家嘅佛教徒普遍係主張「前世今生」係一個比喻，定係世界嘅真相？呢啲問題，由細到大都覺得好神秘深奧，甚至會覺得如果唔係讀返一個相關嘅學位，呢一世都未必會學得識。但而家真係有心想知，你係會得到一個詳盡嘅答案。而且你係可以不斷追問。 就係因為咁，小明嘅2025年，就成為咗如沐春風嘅一年。當然，得到咗知識，唔代表可以將嗰啲知識實踐得到。就算明白咗無常，面對變遷，依然無辦法好似如來佛祖咁CHILL。但係就滿足好奇心而言，有得用ai真係好爽。好耐之前，鄭中基同蔡卓妍同日宣布結婚離婚。小明老母問我，覺得係邊個飛邊個，小明話似係鄭中基，因為佢喊到豬頭咁。老母話，啲藝人好假，眼淚都可以係假。我好想知道真相，但唔會係探究到底，亦都冇呢個渠道。淨係聽啲三姑六婆講，道聽途說，而家就多咗一個渠道，去更貼近真相。但追緊嘅明星秘聞，唔係鄭中基，而係佛祖。 言歸正傳，喺呢到簡單分享一下最近汲收到嘅知識，亦即係最近追緊嘅娛樂新聞。最近追緊嘅新聞，同鄭中基蔡卓妍離婚一樣咁經典，出自如來佛祖開嘅一次記者會，佛祖宣布人類可以要同「我」呢個概念分居。 佛祖話佢心入面根本從來冇「我」，佢嘅意思係咩呢？明明佛祖有時都會話「我」想分享一件事畀大家聽，但點解而家又會話「無我」呢 咁我地就可以Tesla呢個例子去令大家好了解啲喇。Tesla只係一個名，係一個方便溝通嘅說法。Tesla實際上係一堆零件、包括車碌、鐵皮、引鯨等等所組成嘅電動車。再準確啲，係要包埋組裝工人嘅effort、科學家發明、elon musk嘅領導才能等等非物質嘅元素組成，再再準確啲係要加埋elon musk嘅家庭背景，佢賣咗pay pal等等緣份…… 不過，我地為咗方便溝通，所以就安個名比佢叫「tesla」。而你架「tesla」如果壞左，拎咗去劏，變成咗一堆爛鐵。係世俗嘅意義上，tesla係曾經存在過，後來冇咗。但喺超越語言嘅意義上，我地亦可以話係從來都冇存在過。 而「我」呢回事都係一樣，「我」並不存在，只係一堆因緣和合所組成，但係喺世俗意義上，我地安個名比佢叫做「我」。同tesla一樣，「我」地會生老病死，但本質都係一個流動嘅概念。我地冇咗「我」嘅意識，就冇辦法溝通，但執著於「我」嘅意識就會忘記咗「我」喺超越語言嘅殊勝意義上，其實係從來都唔存在。以上嘅說法，我都得到香港兩大哲學明星，白水同豬文approve，應該係冇咩講錯。以前，撞到白水同豬文，我都好有衝動去問佢地呢啲問題。但我都feel到做嗰行厭嗰行，佢地日頭教完書，你夜晚見到佢地仲聊佢地傾呢啲嘢，真係會唔係好想答。而家見到佢地，我都會忍唔住問，但個過程可以話係大大縮短咗，我只係需要確認我係ai到得返嚟嘅答案，算唔算準確。之後，我就可以問返佢地有咗AI之後，老師係咪開始會失業，佢又可以問返我試當真收皮之後我係咪會失業喇。 廣播劇千門八將暫停一期。試當真收皮之前，我相信會寫得完個結局。多謝！ 試當舖（賣嘢）：https://trialanderror.shoplineapp.com/ 課金：https://payme.hsbc/trialanderror924 成為會員「認真毛」：https://www.youtube.com/channel/UCcfdsRaC34Y4IKTiihYxBrQ/join FB/IG: trialanderror924 Discord: https://discord.gg/trialanderror