死忠毛限定《試當真成員VLOG》

Currently Playing: 老師語錄：規劃人生

YEAR1嗰陣，有個教採訪嘅老師，有一日突然教教下，話Year1教嘅嘢其實好淺，覺得呢科唔駛點教，肯睇吓notes同埋有啲常識都已經合格有餘。 之後佢就好有興致咁，分享啲佢嘅人生感悟 佢話，你地點過你嘅year1，就好決定咗你之後個10年人生點過。個意思唔係話，year1考成點，就好影響你既人生。 佢意思係，year1係中學之後，你第一次可以好大程度咁掌握你人生既時間表。你點樣過你嘅year1，就會成為咗你之後既人生既慣性。你習慣咗好跟個學校制度行，你跟住個10年都會好習慣跟個社會制度行，你習慣左同朋友埋堆搵啲野，喺制度以外發生發生，你之後個10年，就算畢左業之後，都係會習慣搵志同道合既人，係社會到搵野發生。習慣咗一個人過，獨來獨往，你跟住個10年都會係咁…… 直至大概去到30歲就會變一變，因為10年左右，個社會就會大變一次，經濟好既時代，就會變經濟差既時代，同屋企人既關係都會變，由可能好少同屋企人接觸，10年之後就可能同屋企人frd返好多，以前鐘意做開學會主席、校隊隊長既，10年之後，可能會想多啲跟人搵食。因為人就係每10年左右就變一變。 呢番說話，雖然唔係完全認同，但係幾深刻。 老師嗰陣時，係想focus去講，我地要開始為自己建立一啲慣性，去令自己既人生既唔同時期，有返一個錨，等自己有個穩定啲既生活。而佢嗰個「錨」就係，時間表。 呢番說話，我今日都仲記得，但係我一直都冇跟佢咁講去做，為自己計劃太多。因為，focus左呢番說話係既最尾嗰part。就係人生每10年就會變一變。 當時，我甚至覺得每個人既人生周期都可以好唔同。未必係以10年為限。有啲人就可能每3年就一個大變，甚至有啲時候，你既人生，每個月都會有翻天覆地既變化。 後來，有份教我同許賢創作既前輩，牛佬仲寫左本半自傳，書名叫赤軀隨遇。就係話人一出世，就係衫都冇咁嚟到呢個世界，遇到啲咩，都決定唔到。雖然我地有好多自由去做唔同既決定，但只要你繼續要同個世界接觸，你都係難免隨波逐流。 即係係一種重新定義既隨波逐流啦。唔係真係話跟人地制度行，跟人地既潮流行，而係一種豁達啲既價值觀。簡單黎講，都係想講變幻才是永恆呢d老套野。 最終，我既year1係點過呢。大概係分左三部份。第一部份就係，應付個學業。所有考試、功課、上堂出席，都係交minimum pay，足夠升班就算。除左啲特別有興趣嘅科目，就會花多d時間。不過我印象中，兩個sem入面係得一科我特別有興趣。 第二部份就係辯論隊，每次有比賽既果個星期，就會拋開一切，淨係係咁開會同寫稿。 不過頭兩部份，都係佔左好少既時間。大部分時間，我都係諗點樣可以有機會去做採訪。 好多次係試當真謝票場或者d雜誌報紙訪問，我都有提過兩次好proud of 既採訪。去放蛇調查果陣時，撐梁振英既示威者有冇收錢，同埋一個呃錢既傳銷公司係點樣運作。 不過我好少提到，其實我更多既時間，係走左去巧立名目同唔同既人做人物專訪。 放蛇既採訪好刺激，會著偷拍衣、戴偷拍錶、一啲唔似錄到音既小裝飾去潛入。成個特工咁。 所以做完嗰兩次特工，之後，我就同當時個呀頭講，我其實真係好鐘意做呢件事，覺得好似做間諜咁，為左種公義，而冒險。而且我已經證明左自己係勝任到，如果佢有任何機會畀我，可以唔駛淨係諗啲full time，可以考慮下我呢個intern。 果時個呀頭係行內出左名熱血既採主，我以為聽到我咁講，一定好老懷安慰，會畀好多機會我呢個咁有熱誠既蘇致豪。 不過佢聽到我咁講之後，一開聲就係同我講屌你老味，我都想日日有咁多蛇放。我請你返黎就係想你搵啲新聞返黎，畀我地做放蛇吖嘛！然後你就可以搭單去埋，你而家調返轉叫我畀你，你有冇常識嫁？ 因為，呢個採主叫飛仔華，原本係蘋果日報既阿頭之一，係一個業界既傳奇。做過好多單好刺激既調查報導，最勁既就係，當年蘋果日報既狗仔隊就係由佢成立。佢真係班左啲機返黎勾警察walkie既線，去知道香港幾時有咩突發野。之後就即刻派電單車狗仔隊去搶先啲警察到。第一時間報道單新聞。 後來，警察換左walkie既系統，阻截左佢地嘅勾線。大家以為狗仔隊從此就收皮，點知佢仲增大規模，請更多既電單車手，部住十八區既所有警署，一有警車出動，就會有架電單車吊住佢地尾去追，雖然，快唔過警察，但都叫做係第一時間去到現場。 不過，十八區既警署，咁撚柒多，有時仲要跟埋救護車、消防車，唔好話蘋果日報，香港邊到得嚟咁多記者。仲要啲記者，大部份都係文質彬彬， 邊到走嚟咁多記者，識jar電單車。於是佢就係啲學校、屋邨果到派傳單，問人有冇電單車牌，有既話就過黎見工。甚至有時唔同人講係嚟見記者。總之就話，識jar電單車，就有資格黎見，唔洗講橕歷，請左你既話就好高人工。於是就有好多人黎見工。 見工既第一關，就係叫人上去頂樓見佢，一見面問左佢咩名，就同對方講，而家畀5蚊你，幫我買罐可樂返黎。仲好似係指名要健怡可樂定雲呢拿可樂。 而其實呢罐可樂，係全棟大廈，得一部汽水機有得買。如果佢地夠眼利，或者夠厚面皮，識周圍問大廈入面既同事，就可以好快買到。如果唔好彩，真係搵唔到呢部汽水機，佢地就要飛車出去第二區買。 而最快買到罐可樂既人，佢就請。結果，佢當年就請左好多冇學歷，黎自五湖四海，甚至係有少少江湖背景，但係好打得既記者。 後來飛仔華，轉左會去星島，而嗰時，我好希望可以跟到佢一齊做野，因為佢之所以叫飛仔華，除左因為個人同班o靚，有啲江湖味之外，佢自己都做唔少黑道題材既偵查報道。不過，只係同佢開過幾次會，佢就開始請病假，冇耐之後仲過左身。 我記得其中一次開會，佢同我講，你緊係好想做好多呢d好刺激既新聞啦。但當時採訪既空間已經開始收窄，如果你仲係有興趣做呢行，可以試下做人訪。 佢話，新聞即係故仔，大新聞，就係好似電影d商業片咁，並拎砰爛，又賣到紙，又精彩。但係故仔，唔係得呢d大片既，如果個世界就係得大片，個世界肯定亂到仆街。有時d人物故事，小品啲，但比起呢d並拎砰爛，更加貼市大眾既生活。於是我就開始上youtube睇好多人物專訪，同埋巧立名目，去約唔同既人出黎做專訪，汲收左好多野。而唔少人講佢地既故事時，我都會問一句，你地係點樣規劃你地既人生？有好多個都係話，人生邊到有得規劃吖。 果陣時，仲未有mbti，冇人會講p人j人，我嗰一年year1，亦冇好似開頭嗰位老師既建議咁，好好咁用時間表去建立自己既錨。但回望返起上黎，就建立左個價值觀，人生係規劃唔到。 不過人總唔能夠，每日都好不安咁過生活，始終要有個錨。year1果時諗，如果個錨，唔係一個好具體時間表既話，就要有一個強大既心靈呢。 而近年呢個答案有所改變，調整左個字眼。 唔再係強大，而係強韌。 強大好可能令人聯想起堅強、硬淨。或者可以抵抗到好多世界既攻擊。 但強韌，就係一種可以適應到唔同世界既彈性。 執笠直播既時候，飲左少少酒，將唔容易，同埋唔能夠從容咁面對變易，既心路歷程，講到一口泡。 希望呢個vlog可以補完返。 出vlog既呢日，美國打伊朗了！伊朗亦都還拖！而早兩日我都踏入三十三歲，根據我既非正統統計，大部份觀眾都係我既年紀上下五年左右，而呢啲歲數，亦都正正係人生周期踏入另一個階段既時候。加上唔知點解，大量做生意既人／玄學／朋友，都會話有d咩等28年再算 令我覺得，大家呢幾年都好易會有啲震盪，改變大家既人生態度，所以係呢到祝大家，馬年、羊年、猴年、雞年、狗年、鼠年既心靈，一路強強韌韌～～～恭喜發財！